From soc.culture.esperanto Tue Jan 18 11:22:55 1994
From: 100272.1601@compuserve.COM (Flandra Esperanto-Ligo)
Date: 15 Jan 94 14:48:03 GMT
Newsgroups: soc.culture.esperanto
Subject: provteksto el Monato

= Laux sugesto de kelkaj, la internacia magazino Monato publikigos per la
= reto cxiumonate du tekstojn. Jen artikolo el la januara numero.
= Por pliaj informoj pri Monato skribu al 100272.1601@compuserve.com.
=========================================================================

Will Green kondukas vin tra sia

Telefona labirinto

Mi estas emerito kun malgranda enspezo. Mi logxas en malgranda domo,
sola, sed kun amikino kiu luas cxambron. Tamen mia telefona sistemo
estas eksterordinare kompleksa, multe pli kompleksa ol oni trovus en
99% de la domoj. Mi havas kvar telefonaparatojn, cxiujn malsimilajn.
Jen kiel tio okazis.

Unue mi acxetis simplan aparaton. Mi povus lui de la telefonkompanio
sed tio estas pli kosta. Mi acxetis do brokante numeron unu.

Por la Esperanto-movado en Britio mi komencis fari sekretarian laboron.
Tial mi acxetis numeron du, kiu per ekraneto montras la konversacian
dauxron por ke pagu la Esperanto-asocio. La ekraneto ankaux indikas la
taghoron. La aparato havas ankaux 16 klavojn kiuj ebligas eniri
apartajn servojn de la telefona kompanio. Tiujn mi klarigos baldaux.

Mortis amikino, kaj sxia familio donacis al mi sxian sendratan
telefonon. La parol/auxskultila peco estas aparte portebla ligate al la
bazo per radio. Tiu estas numero tri.

Laste numero kvar. Komerca firmo petis ke mi eksperimente provu novan
aparaton kiu donas aliron al ankoraux aliaj servoj de la kompanio. Mi
uzu la aparaton sen lua pago, kaj raportu post kelkaj semajnoj.

Do per entute 72 klavoj nun mi havas la jenajn servojn:

1. Se dum mi parolas alia vokanto volas paroli al mi, mi ricevas
signalon kiu permesas al mi teni la unuan konversacion kaj transiri al
la dua, kaj reiri al la unua, kaj poste denove al la dua, ktp.

2. Memorilo tenas 18 ofte uzatajn numerojn, kiujn eblas voki per simpla
premo de unu klavo aux du.

3. Mi kontrolas la dauxron de cxiu konversacio sur la ekraneto.

4. Premante klavojn mi povas arangxi esti vokata de la masxino je
fiksita horo, kvazaux vekhorlogxo.

5. Vizitonte amikojn aux Esperanto-centron, mi povas premi klavojn kiuj
sendos al ties numero cxiun vokon kiu venas al mia hejma numero.

6. Preminte alian klavon mi estas informata tuj pri la kosto de iu
jxusa konversacio.

7. Uzante kodon mi povas telefoni, kaj arangxi, ke la kosto iru al la
konto de specifa alia numero, ne al mia hejma fakturo.

8. La Esperanto-centro havas respondmasxinon. Per eta aparato tiun
masxinon mi povas funkciigi tra iu alia (ecx publika) telefono en la
mondo kaj auxskulti la mesagxojn lasitajn en la masxino.

9. Mi ricevas monate plenan liston de cxiu konversacio pli longa ol 4
minutoj, kun la numero vokita, la dauxro, la dato kaj la horo.

10. Se dum konversacio mi volas private paroli kun alia persono en mia
cxambro sen ke la telefonata persono auxdu, mi premas klavon.

11. Per klavo mi povas teni la vokinton dum mi sercxas informon aux
personon. Dume sxi/li auxdas muzikon.

12. Se vokata numero estas okupita, aux ne respondas, poste mi povas
reprovi per unu klavopremo sen memori la numeron.

13. Se mi havas la porteblan aparaton en la gxardeno aux apuda strato
mia amikino hejme povas atentigi min.

Kaj fine 14. Mi povas starigi barieron kiu ebligos ke nur mi per mia
sekreta kodo uzu la aparaton.

Mi estas normala simpla homo, sed la sorto kondukis min en cxi tiun
labirinton de ege utilaj kaj foje mistifikaj fenomenoj...

Will GREEN